ថ្នាក់ដឹកនាំ​ជាន់ខ្ពស់​ចិន និង​ហ្វីលីពីន នឹងមាន​វត្តមាន​នៅក្នុង​ព្រះរាជ​ពិធី​ថ្វាយ​ព្រះ​ភ្លើង

     

លោក ​រដ្ឋមន្ត្រីក្រសួង​ព័ត៌មាន ខៀវ កាញារិទ្ធ បាន​ថ្លែងប្រាប់​អ្នកសារព័ត៌មាន​កាលពី​ព្រឹក​ថ្ងៃ​ព្រហស្បតិ៍ ទី១០ ខែមករា នេះ ថា ក្រៅពី​នាយករដ្ឋមន្ត្រី​បារាំង Jean-Marc Ayrault ថ្នាក់ដឹកនាំ​ជាន់ខ្ពស់​ចិន ហ្វីលីពីន ក៏​នឹងមាន​វត្តមាន​ផងដែរ​នៅក្នុង​ព្រះរាជ​ពិធី​ថ្វាយ​ព្រះ​ភ្លើង​ព្រះ​បរម​ រតន​កោដ្ឋ នា​ថ្ងៃទី៤ ខែកុម្ភៈ ខាងមុខនេះ។


ជាមួយនឹង​ការបញ្ជាក់​មិន​ផ្លូវការ​មួយ អ្នកនាំពាក្យ​របស់​រដ្ឋា​ភិ​បាល​រូបនេះ បានបញ្ជាក់​ឲ្យ​ដឹងថា អនុ​ប្រធានាធិបតី​ហ្វីលីពីន [លោក Jejomar Binay] ប្រធានសភា​ជាន់​ទាប​ចិន [លោក Jia Qinglin] ដែលជា​ឥស្សរជន​ជាន់ខ្ពស់​លំដាប់​ទី​បួន​របស់​ចិន នឹងមាន​វត្តមាន​នៅក្នុង​ពិធី​ខាងមុខ។

លោក​បាន​បន្ថែមថា ប្រតិភូ​ឥណ្ឌា និង​តំណាង​សមាជិក​អាស៊ាន​មួយចំនួន​ដែល​មិនមែនជា​ថ្នាក់​នាយករដ្ឋមន្ត្រី ត្រូវបាន​រំពឹងថា​នឹងចូលរួម​នៅក្នុង​ព្រះ​ពិធី​នៅ​ខែក្រោយ​ផងដែរ ដោយ​ការមកដល់​របស់​មន្ត្រី​បរទេស​ទាំងនោះ អាច​ស្ថិតនៅ​ចន្លោះ​ពីថ្ងៃ​ទី២ ដល់​ថ្ងៃទី៤ ខែកុម្ភៈ៕
From: www.thmeythmey.com