ប្រមុខ​​រាជ​រដ្ឋាភិបាល​​គាំទ្រ​​​ឱ្យ​​មានច្បាប់​ស្តីពី​​ក្រ​​ម​សីលធម៌​​សម្រាប់​អ្នក​នយោ​បាយ​

រាជ​ធានីភ្នំពេញ ៖ សម្តេច​នាយករដ្ឋមន្រ្តី​ ហ៊ុន សែន បានគំាទ្រ​ឲ្យមានច្បាប់ស្តីពី​ក្រមសីលធម៌សម្រាប់​អ្នកនយោ​បាយ ។​ សម្តេច​មានប្រសាសន៍​​គំាទ្របែបនេះ​នៅព្រឹកថ្ងៃទី​១៤ មករា ២០១៣​ក្នុងឱកាស​អញ្ជើញជាអធិបតី​ភាពក្នុង​ពិធី​ចែកសញ្ញា​បត្រ​ដល់​និស្សិត​ ជ័យលាភី១​០៥០នាក់ នៃសាកល​វិទ្យា​ល័យបញ្ញា​សាស្រ្ត​កម្ពុជា ។

សម្តេចតេជោ​បានមានប្រសាសន៍​ថា កាសែតភ្នំពេញ​ប៉ុស្តិ៍សរសេរថា គួរតែមានក្រមសីលធ៌ម​ចំពោះអ្នកនយោបាយ​និយាយ!!! បើបានដូច្នេះ​​មែន គឺល្អតែម្តង ខ្ញុំចូលចិត្ត​ណាស់អាហ្នឹង ។ បើមានក្រមសីល​ធ៌ម គឺជាការល្អ​ហើយ ចងគ្នា​ឲ្យជាប់ ឥឡូវ​ដាក់មក ដើម្បីអនុម័​តជាច្បាប់តែម្តង ​បើអ្នក​ឯង​ហ៊ានប្រើភាសាគ្មានក្រម​សីលធម៌ គឺត្រូវជាប់ទោស​ប៉ុន្មាន? តើហ៊ាន ឬ​អត់?

សម្តេចនាយករដ្ឋមន្រ្តី ហ៊ុន សែន មានប្រសាសន៍បន្តថា ខ្ញុំហ៊ានប្រកាស​ខ្ញុំទទួលស្គាល់ទំាងអស់ ប៉ុន្តែត្រូវអនុម័តដោយច្បាប់ ទើបអាចចងជាចំណងបាន ។ បើមិនអនុម័តដោយច្បាប់ទេ ចងជាចំណងអត់បានទេ .... ។

គួរបញ្ជាក់​ដែរថា នាពេលកន្លង​មកអ្នកនយោបាយមួយចំនួន​ក្នុងប្រទេសកម្ពុជា នៅមុនពេល​បោះឆ្នោត ឬ អំឡុងពេលយុទ្ធ​នាការស្វែងរក​សំឡេង​​ឆ្នោតក្តី គេតែងឮមានការប្រើពាក្យ​ពេចន៍មិនសមរម្យ ធ្វើឲ្យមានការរិះ​គន់ពីសំណាក់ប្រជាពលរដ្ឋ ក៏ដូចជាមជ្ឈដ្ឋានទូទៅមួយចំនួន ៕