ស្រប​ពេល​ដែល​ក្រុម​ Real Madrid កំពុង​តាម​ពី​ក្រោយ​ក្រុម​​កំពូល​តារាង​ FC Barcelona ​ដល់​ទៅ​១៨​ពិន្ទុ​នៅ La Liga ​ហើយ​ទំនាក់ទំនង​រវាង​សារព័ត៌មាន​អេស្ប៉ាញ​ជាមួយ​លោក​ Jose Mourinho ​ឈាន​ទៅ​រក​ភាព​មិន​ស៊ី​ខ្សែ​គ្នា​កាន់​តែ​ខ្លាំង​ឡើង​នោះ​ គេ​រំពឹង​ថា​​មិន​យូរ​ទេ​គ្រូ​បង្វឹក​សញ្ជាតិ​ព័រទុយហ្គាល់​រូប​នេះ​នឹង​ ស្វែង​រក​ការងារ​ថ្មី។​
ជាមួយ​គ្នា​នេះ​ ​អង់គ្លេស​គឺ​ជា​គោលដៅ​ដ៏​ជាក់លាក់​មួយ​របស់​លោក​ Mourinho ​ព្រោះ​​​គ្រូ​បង្វឹក​វ័យ​៤៩​ឆ្នាំ​មាន​ក្ដី​ស្រលាញ់​ខ្លាំង​ចំពោះ​បាល់ទាត់​នៅ​ក្របខ័ណ្ឌ Barclays Premier League ​ខណៈ​អនុស្សាវរីយ៍​កាល​លោក​នៅ​ដឹក​នាំ​ Chelsea ក៏​មិន​ទាន់​រសាយ​ពី​ការ​ចងចាំ​របស់​លោក​ដែរ។​
ក្នុង ​សារ​វីដេអូ​មួយ​ជាមួយ​ FA ​ដែល​នឹង​បង្ហាញ​ជា​សាធារណៈ​នៅ​កណ្ដាល​ទីក្រុង​ឡុងដុង​នៅ​ថ្ងៃ​ពុធ​ស្អែក​ជា ​ផ្នែក​មួយ​នៃ​ការ​អបអរ​ខួប​ទី​១៥០​នៃ​កំណើត​​​ស្ថាប័ន​គ្រប់គ្រង​បាល់ទាត់​ អង់គ្លេស​ គ្រូ​បង្វឹក​ដែល​ជួយ​ឱ្យ FC Porto និង Inter Milan ឈ្នះ​ជើងឯក​ Champions League ​បញ្ជាក់​ច្បាស់​ថា​ថ្ងៃ​ណា​មួយ​លោក​នឹង​ត្រលប់​ទៅ​ធ្វើការ​នៅ​អង់គ្លេស​វិញ ព្រោះ​​គ្មាន​កន្លែង​ណា​ត្រូវ​ទៅ​ប្រសើរ​ជាង​​នេះ​​ទេ។​
លោក Jose Mourinho ពេល​ទស្សនា​ការ​ប្រកួត Premier league រវាង Man Utd និង Liverpool
“នៅ ​អង់គ្លេស​ អ្នក​មាន​សេចក្ដី​ស្រលាញ់​ដ៏​ពិត​ប្រាកដ​ចំពោះ​ការ​ប្រកួត។ វា​មិន​ត្រឹម​តែ​ជា​ក្ដី​ស្រលាញ់​ចំពោះ​ក្លិប​ប៉ុណ្ណោះ​ទេ ជា​ចម្បង​គឺ​ក្ដី​ស្រលាញ់​ចំពោះ​បាល់ទាត់”។ អតីត​គ្រូ​បង្វឹក​ក្រុម​តោ​ខៀវ Chelsea បន្ត​ថា “ខ្ញុំ​មាន​អនុស្សាវរីយ៍​ច្រើន​ណាស់​នៅ Chelsea។ ខ្ញុំ​ស្រលាញ់​វា​តាំង​ពី​ថ្ងៃ​ដំបូង​រហូត​ដល់​ថ្ងៃ​ចុង​ក្រោយ។ ខ្ញុំ​មិន​សោកស្ដាយ​ថ្ងៃ​ចុង​ក្រោយ​របស់​ខ្ញុំ​ទេ ពីព្រោះ​ក្រោយ​ពី​នោះ​មក​ខ្ញុំ​មាន​សំណាង​បាន​ទៅ​ធ្វើការ​នៅ​អ៊ីតាលី​ហើយ​ ទទួល​ជោគជ័យ​មួយ​ចំនួន​នៅ​ទីនោះ រួច​បន្ត​មក​អេស្ប៉ាញ។ ខ្ញុំ​ដឹង​ថា​ថ្ងៃ​ណា​មួយ​ខ្ញុំ​នឹង​ត្រលប់​ទៅ​អង់គ្លេស​វិញ ព្រោះ​បាល់ទាត់​នៅ​អង់គ្លេស​មាន​ន័យ​ជ្រាលជ្រៅ​ណាស់​សម្រាប់​ខ្ញុំ”។
​ លោក​ Mourinho ​ក្លាយ​ជា​បុគ្គល​សំខាន់​ដែល​គេ​ចាប់​អារម្មណ៍​ច្រើន​នៅ​អង់គ្លេស​តាំង​ពី​ ពេល​លោក​ដឹក​នាំ FC Porto ​ទៅ​ផ្ដួល​ក្រុម​បិសាច​ក្រហម​ Man Utd ​ក្នុង​ពាន​រង្វាន់ Champions League ​នៅ​ Old Trafford ក្នុង​ឆ្នាំ​២០០៤។ រដូវ​កាល​បន្ទាប់​ លោក​បាន​ប្រកាស​ហៅ​ខ្លួន​​ឯង​ថា “The Special One” ​ពេល​លោក​ចូល​កាន់​តំណែង​នៅ Stamford Bridge ​ជា​ទី​ដែល​លោក​​ជួយ​ Chelsea ​ឈ្នះ​៥​ពាន​រង្វាន់ បូក​រួម​ទាំង​ជើងឯក Premier League ពីរ​ឆ្នាំ​ជាប់​គ្នា​ក្នុង​៣​រដូវ​កាល​នៅ​ទីនោះ៕